Farfesa Joash Amupitan, wanda aka naɗa a matsayin wanda zai zama shugaban hukumar zaɓe ta ƙasa (INEC), ya ce zai dawo da amana da sahihanci a tsarin zaɓen Najeriya idan aka tabbatar da shi.
Da yake magana a yayin tantancewarsa a majalisar dattawa ranar Alhamis, Amupitan ya bayyana cewa burinsa shi ne tabbatar da gaskiya da bayyana gaskiya a zaɓe har ta kai ga “wanda ya sha kasa zai taya wanda ya yi nasara murna.”
Ya bayyana shirin gyaran da ya ƙunshi kafa kwamiti na ladabi a hukumar, gabatar da tsarin bayar da rahoton ɓarnar (whistleblower), da amfani da fasaha irin su jiragen ɗron don inganta tsaro da sufurin kayan zaɓe.
Amupitan ya kuma yi alkawarin yin aiki tare da majalisar dokoki wajen kafa hukumar da za ta kula da laifukan zaɓe, da kuma tabbatar da cewa babu wanda aka hana damar kada kuri’a ko a yankuna masu nisa.
Ya ce zai inganta wayar da kai ta masu zaɓe da kuma tsarin koyar da ɗabi’ar dimokuraɗiyya, tare da tabbatar da gaskiya da amfani da kuɗaɗen gwamnati yadda ya dace.
“Za mu tabbatar da sahihin zaɓe har wanda ya sha kasa zai iya cewa ‘ka ci’, saboda tsarin zai zama mai gaskiya,” in ji Amupitan.
